Lættari at finna tøk parkeringspláss

Hugskotsverkstovan, Talgilda tín bý, hevur verið í Havn um vikuskiftið. Endamálið var at fáa hugskot, sum kunnu vera við til at talgilda býin, og besta hugskotið er ein skipan, ið skal lætta um parkeringstrupulleikarnar í býnum. 

Vinnandi hugskotið er ein skipan, sum við nýmótans tøkni ger tað lættari at finna tøk parkeringspláss í býnum.

Annika Gregoriussen, Hans Olivur Joensen, Hilmar Simonsen og Birita Jacobsen mannaðu vinnandi bólkin, TórsPark, sum fekk 50.000 kr. fyri besta hugskotið.

Traðka og Saman næstbest
Á øðrum plássi komu hugskotini Traðka og Saman.

“Traðka” er ein app, ið á stuttligan hátt eggjar fólki at ganga, súkkla og taka bussin heldur enn bilin til og frá arbeiði. Endamálið er minka um dálkandi útlát frá ferðsluni. 

“Saman” er ein app, ið skal knýta fólk við somu áhugamálum saman, so tey í felag kunnu ganga til ítriv ella gera eitthvørt annað, ið tey hava hug til.

Fyri næstbesta hugskotið fingu bólkarnir 5.000 kr. hvør.

Níggju aðrir bólkar vóru við í hugskotsverkstovuni, sum KT-deildin og Hugskotið í Tórshavnar kommunu skipaðu fyri saman við Fróðskaparsetur Føroya í Sjóvinnuhúsinum fríggjadagin og í gjár.