Meira av toski og hýsu

Væl meira av toski og hýsu eru avreidd higartil í ár, sammett við í fjør.

Tað vísa tølini hjá Hagstovu Føroya.

Avreiðingarnar av botnfiski tilsamans eru í nøgd áleið tær somu tríggjar teir fyrstu árfjórðingarnar í ár, samanborið við sama tíðarskeið í fjør. Men av týdningamesta botnfiskinum er væl meira avreitt av toski og hýsu  - ávikavist 30 og 25 prosent. Upsin vigar tó mest í heildini, og er nakað minni avreitt av upsa, um 9 posent og 8 prosent minni av øðrum botnfiski.

Av flatfiski er nøgdin tilsamans minkað 18 prosent, og væl minni av svartkalva er komið upp á land í ár.

Í síni heild er virðið á botnfiskinum vaksið 12 prosent, meðan nøgdin er vaksin 3 prosent.

Uppgerðin vísir annars, at botnfiskanøgdin tilsamans enn er lág, tó at glottar eru, og nøgdin av toski og hýsu higartil í ár er tann frægasta, sum verið hevur í fleiri ár.