Føroyingar aftra seg við at flúgva við SAS

SAS flýgur bara fýra ferðir um vikuna millum Keypmannahavn og Vágar í vetur, ein túr minni enn í fjørvetur.

At SAS-flogførini ikki hava RNP-skipan, sum flogførini hjá Atlantsflogi hava, ger, at føroyingar aftra seg við at flúgva við SAS. 

Mariam Skovfoged, kunningarstjóri í SAS, sigur við Dimmalætting, at túratalið er minkað, tí eftirspurningurin er minkaður, men eisini tí, at SAS bíðar framvegis eftir at fáa góðkenning til RNP-skipanina. 

Aðalmálið er føroyingar

Mariam Skovfoged sigur, at eitt nú danir, kinesarar og amerikanarar flúgva við SAS á Føroya-rutuni, men aðalmálið er at fáa føroyingar flúgva við SAS. Tí hevur RNP-skipanin so stóran týdning fyri felagið, sigur hon .

SAS hevur tikið týsdag, mikudag og leygardag úr ferðætlanini í vetur, men um jóltíðir og á nýggjárinum verður flogið hvønn dag. 

Mariam Skovfoged sigur við Dimmalætting, at SAS fer at flúgva fleiri túrar á Føroya-rutuni, tá summarferðaætlanin kemur í gildi.