Elveitingareftirlitið verjir príshækking hjá SEV

Oljuprísurin og seinkað vindorka eru orsakirnar til, at Elveitingareftirlitið hevur góðkent, at SEV hækkar prísin í 2019.

Oljan fer at kosta SEV 65 mió. kr. meira næsta ár enn hon gjørdi í 2016, tá oljuprísurin var tann lægsti í nógv ár, og góðar tíggju milliónir meira enn í ár.

Vindmyllulundirnar eru harafturat seinkaðar, so ágóðin av spardum oljuútreiðslum kemur seinni enn áður mett. 

Prísurin fyri streym hjá húsarhaldunum verður tann sami næsta ár, sum hann var árini 2013 til 2016, 1 kr. og 89 fyri kilowatttíman.  

Í 2019 væntast skuldin hjá SEV at verða 1,5 mia. kr.

Og hon kann fara heilt upp í 2,4 mia. kr. í 2025, sigur Elveitingareftirlitið, sum tekur undir við, at skuldin hjá SEV ikki kann vera størri enn seks ferðir rakstrarinntøkuna hjá felagnum fyri rentur og avskrivingar. 

Elveitingareftirlitið sigur, at kapping um vindorkuna kann hava positiva ávirkan á elveitingina, um onnur enn SEV kunnu bjóða seg fram við kappingarførum prísum.