Herða kriminallógina í Grønlandi

Kriminal-lógin í Grønlandi verður nú dagførd á fleiri økjum innan kynslig brotsverk. Tað er greitt, eftir at fólkatingið undir 1.viðgerð í síðsu viku tók undir við uppskoti frá danska løgmálaráðharranum, Søren Pape Poulsen. - Danska kriminal-lógin er dagførd á hesum øki í 2009 og 2013. 

Ráðið fyri grønlendska rættarverkið mælir til, at grønlendska kriminal-lógin verður dagførd í tráð við danskar herðingar, og landstingið og landsstýrið taka undir við hesum.

Herðingarnar í grønlendsku lóggávuni snúgva seg m.a. um 

- siðamisbrot móti børnum, sum eru ættleidd, 

- at kynslig brotsverk innan hjúnarlag skulu dømast á sama hátt sum kynslig brotsverk uttanfyri hjúnarlag.

- at kynslig brotsverk móti børnum yngri enn 12 ár verða pr. definitión dømd sum neyðtøka. 

- barnaporno verður kriminaliserað, eisini tá hugt verður eftir tí á internetinum. Sambært verðandi grønlendskari lóggávu er tað fyrst revsivert, tá tú hevur slíkt tilfar liggjandi á telduni hjá tær.

- at tað verður ólógligt at tiltuska sær kynsiliga samveru við at gera sær dælt av einum persóni, sum er sálarliga sjúkur ella menningartarnaður,

- og tað verður dømt sum neyðtøka, um tú tiltuskar tær kynsliga samveru við ein persón, sum ikki er førur fyri at verja seg.

Lógaruppskotið er beint í grønlands-nevndina í Fólkatinginum til viðgerðar.