Revsilógin umsett men ikki broytt nevnivert

Arbeiðið at umseta revsilógina til føroyskt heldur fram.

Nú eru partarnir um brotsverk móti almennum myndugleikum, brotsverk móti almennum friði og skilhaldi, brotsverk í tænastu ella starvi hjá tí almenna, følsk frágreiðing og følsk ákæra og brotsverk viðvíkjandi gjaldsmiðlum og skjalafalsan sendir til hoyringar.

Løgmansskrivstovan sigur, at ætlanin við lógaruppskotinum er í høvuðsheitum at føroyska revsilógina umframt at gera onkrar smávegis dagføringar í lógini. 

Í sambandi við, at revsilógin verður føroyskað, er ikki ætlanin, at føroyski teksturin innihaldsliga skal víkja frá danska tekstinum uttan í teimum førum, har føroysk viðurskifti hava gjørt, at onkrar ásetingar í danska tekstinum ikki eru tiknar við, sigur Løgmansskrivstovan. 

Umseta og dagføra

Á heysti 2015 samtykti løgtingið at heita á landsstýrið um at dagføra og føroyska revsilógina. 

Hetta verður gjørt í stigum.

Revsilógin er býtt í tveir partar, ein almennan part og ein serligan part. 

Í almenna partinum eru reglur um treytirnar fyri at revsa. 

Í serliga partinum eru nevnd tey vanligu álvarsligu brotsverkini.