Árant Andriasson fyribilsstjóri á Landsverki

Landsstýrismaðurin í samferðslumálum, Heðin Mortensen, hevur sett Árant Andriasson í starv sum stjóra á Landsverki, til nýggjur landsverkfrøðingur er settur og tekur við starvinum.

Tað stendur at lesa á heimasíðuni hjá samferðslumálaráðnum. Árant Andriasson kemur frá starvinum sum varastjóri á Landsverki. 

Tann 19. desember boðaði samferðslumálaráðið annars frá, at táverandi stjórin á Landsverki, Ewald Kjølbro, fór frá sum stjóri eftir málið um byggingina av Marknagilsdeplinum. 

Í tí sambandi boðaði landsstýrismaðurin frá bygnaðarbroytingum í leiðsluni á Landsverki. Eitt nú skuldi leiðslan býtast í tríggjar deildir við trimum nýggjum leiðarum, sum allir vístu beinleiðis til samferðslumálaráðið. 

Sambært tíðindaskrivinum, sum kom fyri løtu síðani, er hetta tó broytt enn eina ferð. Framhaldandi verður bygnaðurin á Landsverki, sum hann var undir undanfarna stjóra. 

Setti stjórin hevur sambært Samferðslumálaráðnum evstu ábyrgd av, at øll verklagsarbeiði hjá landinum verða væl frágingin, av fíggjarstýring, og at játtanir verða hildnar.