Toppfundur á skránni í februar

Amerikanski forsetin Donald Trump og leiðarin í Norðurkorea, Kim Jong-Un, fara at fundast aftur í februar. Tað skrivar almenni brúkarin hjá teimum hvítu húsunum á Twitter. 

Í gjár hittist Trump við ovasta sendimannin í Norðurkorea til eitt prát um kjarnorkudubbing, og tá fundurin varð liðugur, varð nýggi toppfundurin kunngjørdur. 

Talskvinnan hjá Trump, Sarah Sanders, segði eftir fundin í gjár, at talan var um ein produktivan fund, men at USA framvegis fer at leggja trýst á og seta revsitiltøk í verk móti Norðurkorea, til landið gevst við øllum kjarnorkuætlanum. Tað skrivar CNN.

Fyrstu ferð Kim Jong-un og Donald Trump hittust var í juni í fjør. Fundurin var hin fyrsti nakrantíð millum ein amerikanskan forseta og ein norðurkoreanskan leiðara. 

Støðan millum USA og Norðurkorea hevur í longri tíð verið spent. Trump hevur fleiri ferðir sagt, at norðurkoreanski leiðarin er ein serstakliga stór hóttan móti Amerika, og eisini hevur amerikanski forsetin hótt við at oyðileggja Norðurkorea. 

Komandi toppfundurin verður síðst í februar, men enn er ikki greitt, hvar fundurin verður.