Vilja ikki samstarva við flokkin hjá Orban

Átta evropeiskir flokkar krevja, at ungarski flokkurin, Fidesz, sum Viktor Orban, forsætisráðharri, stendur á odda fyri, verður koyrdur úr borgarliga bólkinum í Evropa-tinginum, EPP.

Flokkarnir hava skrivað til formannin í tingbólkinum, har teir krevja, at Fidesz verður koyrdur burturúr, tí ósemjan er so stór, skrivar bretska dagblaðið Financial Times.

Orban hevur funnist at integrasjónspolitikkinum í ES og ES-nevndarformanninum, Jean-Calude Juncker.

Funnist verður at Fidesz fyri at lata sum einki í grundleggjandi rættarprinsipiellum málum og fyri at avmarka talu- og skrivifrælsið.

Atkvøða 20. mars

Borgarligir flokkar í Grikkalandi, Svøríki, Belgia, Portugal, Finnlandi og Hollandi eru millum teirra, sum vilja reka Fidesz úr EPP í ES-tinginum.

Ætlanin er at atkvøða um spurningin 20. mars.

Val verður til ES-tingið í mai, og sambært veljarakanningum í Ungarn, stendur Fidesz til at fáa 53 prosent av atkvøðunum, ella 13 tingsessir.