Fjølrit fer aftur at gjalda viðurlag

Fjølrit fer nú undir at gjalda viðurlag til limirnar fyri fyrstu ferð í seks ár.

Virksemið hjá Fjølrit hevur ligið stilt í fleiri ár, tí leisturin fyri útgjald skuldi umskipast, soleiðis at tey, sum eiga rættindi til verkini, fá viðurlag, tá tað verður brúkt, heldur enn at gjalda peningin út í stuðli til verkætlanir.

Nýggjar avtalur gjørdar

Í tí sambandi eru nýggjar avtalur millum annað gjørdar við land og kommunur um nýtsluna av tilfari til undirvísing.

Fjølrit umboðar millum annað verk, sum greinir, yrkistekstir, fagurtekstir, týðingar, yrkingar og sangtekstir, nótar, myndlist og fotomyndir.

Fjølrit heitir á allar rættindahavarar um at skráseta seg á heimasíðuni hjá teimum, so tey kunnu fáa viðurlag útgoldið. Á heimasíðuni hjá Fjølrit ber eisini til at síggja, nær tú verður mettur at vera rættindahavari.