Skert borðtennislandslið til Oyggjaleikir

Profilar verða ikki við

Tað er eitt skert landslið, sum fyrireikar seg til oyggjaleikirnar. Silvurvinnarin í einmansleiki og gullvinnarin í tvímansleiki, Henrietta NIelsen, verður ikki við á leikunum í ár.

Tað verður Durita F. Jensen, sum vann gull saman við Henriettu í tvímansleiki, heldur ikki. Samanborið við leikirnar í 2017, so eru tað bara Pætur Albinus og Eyðun Ellendersen, sum eisini eru við í ár. 

Her vinna Henrietta Nielsen og Durita F. Jensen gull í tvímansleiki á Gotlandi í 2017.

Væntar ikki heiðursmerkir

Peter Niclasen, landsliðsvenjari, væntar at hetta kemur at merkjast, og at tað verður torført at endurvinna nøkur heiðursmerkir. 

Føroyameistarin í ár, Fróði F. Jensen, er við á leikunum í ár, og landsliðsvenjarin vónar, at Fróði kann gera ein vørr og røkka einari hálvfinalu. Peter Niclasen sigur annars, at mótstøðan er sterk í ár og at tað verður torført at koma uppá nakran sigursskammil.

Leikarnir eru væl fyri og á venjingarleguni verður serligur dentur lagdur á smálutirnar í spælinum hjá hvørjum einstakum leikara. Borðtennislandsliðið er á venjingarlegu til mikudagin, og fara síðani til Gibraltar hósdagin.