Fyrsti tilburður av ebola í Goma

Goma er størsti býur í landinum, sum higartil er raktur av smittuni. Heilsumálaráðið í Kongu staðfestir, at tann smittaði varð funnin skjótt, tað var ein prestur, sum kom til Goma úr býnum Butembo.

Presturin hevði vitjað og prædika í Butembo, og har hevði hann tikið í hondina á fólki. Heilsumálaráðið upplýsir, at hann á henda hátt er komin í samband við tey sjúku.

Sjúkueyðkennini komu longu í Butembo, men bløðarafepurin ebola varð ikki staðfestur fyrr enn á eini kanningarstovu í Goma.

Bóru skjótt at

- Av tí at sjúklingurin fekk staðfest sjúkuna so skjótt, er smittuvandin lítil, og ferðafólkini, sum vóru í sama bussi, sum presturin til Goma, er koppsett í dag, sigur heilsumálaráðið.

Síðani desember eru fleiri tilburðir av ebola staðfestir. Higartil er miljónabýurin Goma sloppin undan smittuni.

Helst tí at íbúgvarnir eru koppsettir eftir at smittan í desember gjørdi um seg í Butembo, sum liggur 300 kilometrar frá Goma.

Nýggj koppseting

Ebolasmittan har eysturi í Kongo-Kingshasa hevur higartil kravt 1.655 mannalív. Sambært heilsumálaráðnum í landinum er 694 fólk vorðin frísk frá sjúkuni, og meira enn 160.000 fólk eru koppsett móti ebola.

Heimsheilsustovnurin WHO vónar at gera enda á smittuni við nýggju koppsetingini. Men hernaðarlig álop móti sjúkrahúsum og fíggindaskapur frá øðrum fólkabólkum hava tó gjørt, at kinkur er komin í arbeiðið, at koppseta fólk.

Tað hevur eisini verið torført hjá heilsustarvsfólkum at finna tey, sum eru smittað, tí uppreistrardeildir eru í økinum og óvissa valdar í Ituri og í norðaraparti av Kivu-økinum. Hetta er tíggjundu ferð at ebola herjar í Kongo-Kinshasa. Í 2014 til 2016 doyðu 11.300 fólk av ebola í Vesturafrika.