121 menn og 58 kvinnur bjóða seg fram

Tilsamans 179 valevni bjóða seg fram á løgtingsvalinum, sum verður 31. august, 121 menn og 58 kvinnur.

Freistin at lata valevnislistar inn var klokkan seks í gjárkvøldið. Níggju flokkar stilla upp. 

Tjóðveldi hevur flestu valevnini, tilsamans 34, Sambandsflokkurin hevur 29, Javnaðarflokkurin og Fólkaflokkurin hava 28 valevni hvør, Sjálvstýri og Miðflokkurin 15 hvør, Framsókn 14, Framtakið fyri rættinum at velja kannabis 12, og Føroyaflokkurin hevur fýra valevni.

Kristin og Tórbjørn stilla upp

Nú valevnislistarnir eru latnir inn, er greitt, at Kristin Michelsen stillar upp fyri Sjálvstýri.

Kristin Michelsen varð koyrdur úr javnaðarflokkinum fyrr í ár, og hevur verið uttanflokka síðani. 

Tórbjørn Jacobsen, borgarstjóri í Runavíkar kommunu, er á listanum hjá Tjóðveldi.  Av teimum 179 valevnunum eru 58 kvinnur, ella 32 prosent.