Her fáa tey eisini frítíðarkort

– Á fíggjarætlanini hava vit sett 2000 krónur av til eitt ognarkort til hvønn borgara millum 0 og 17 ár. Børn og ung ráða sjálvi fyri, hvussu kortið verður brúkt eftir teirra egna áhuga.

Tað skrivar Javnaðarflokkurin á Tvøroyri, sum eisini situr í meiriluta í Tvøroyrar býráð.

Runavíkar býráð samtykti eina líknandi skipan fyri tveimum vikum síðani - í fyrstu syftu sum royndarskipan. Nakrar dagar seinni boðaðu grannarnir í Nes kommunu frá, at tey somuleiðis fara undir átakið.

Frítíðarkortið er eitt persónligt ognarkort, sum kann nýtast til ítróttar-, mentanar- og frítíðarøkinum. Virðiskortið er skattskyldugt, siga TAKS og løgfrøðiligur ráðgevi, sum Runavíkar kommuna hevur tosað við.