- Tíðindi, mentan og ítróttur
16 fólk deyð í eldgosi
Tvey fólk afturat er deyð á sjúkrahúsi um vikuskiftið, og harvið eru 16 fólk deyð orsakað av eldgosinum nú, skrivar avstralski miðilin News.
Enn eru tvey fólk saknað, og hóast bjargingarlið hava leitað eftir teimum, er ikki eydnast at finna tey.
Hildið verður, at tey eru deyð og at líkini liggja í sjónum við gosoynna. Løgreglan sigur, at tey framvegis hava kavarar í sjónum, sum leita.
Gosfjallið Whakaari er væl vitjað av ferðafólki. Mánadagin goysti gosfjallið, meðan 47 fólk vitjaðu oynna, tey vóru úr Avstralia, USA, Týsklandi, Kina, Bretlandi og Malaysia.
Enn eru yvir tjúgu innløgd við álvarsamum brunasárum.
Í morgin, mánadagin, verður tøgn í eitt minutt í Avstralia kl. 14.11 lokala tíð, tí tá er júst ein vika síðani deyðiliga eldgosið.