Sáttmálasamráðingar jólatrøll

Seinasti fundurin í ár millum partarnar var í gjár, sigur Jan Mortensen, stjóri á Lønardeildini í Fíggjarmálaráðnum. Og á fundinum í gjár samdust partarnir um at hittast aftur í januar.

Lønardeildin hevur samráðst við Starvsmannafelagið, Føroya Lærarafelag og Felagið hjá føroyskum sjúkrarøktarfrøðingum í heyst og í vetur, men enn eru partarnir ikki komnir á mál.

Jan Mortensen sigur, at Lønardeildin hevur havt samskifti við onnur fakfeløg eisini, men ongar ítøkiligar samráðingar. Miðað verður eftir at avgreiða lønarsáttmálan við tey stóru feløgini fyrst, ella í øllum førum okkurt av teimum.

Størsta felagið er Starvsmannafelagið, síðani er lærarafelagið, og triðstørsta felagið er sjúkrarøktarfrøðifelagið. Jan Mortensen sigur, at tað gongur spakuliga framá, og eisini á fundinum í gjár vórðu framstig gjørd, sigur hann.