Kommunurnar skulu eisini fíggja forskúlarnar

Kommunurnar skulu nú eisini fíggja forskúlaflokkarnar í frískúlum, ætlar landsstýrið, sum vil broyta frískúlalógina frá 2003, so kommunur gjalda raksturin hjá forskúlaflokkum í frískúlum. 

Ymiskt er, hvussu kommunur skilja ásetingina um forskúlaflokkar, sigur Uttanríkis- og mentamálaráðið.

Ráðið heldur, at forskúlaflokkar í frískúlum eiga at viðgerast eins og forskúlar í fólkaskúlanum, har kommunan rindar allar rakstarútreiðslur, eisini stuðul starvsfólkalønir. 

Má gerast greiðari

Hetta er ikki nóg greitt í frískúlalógini. Tí halda summar kommunur, at landið eigur at rinda stuðulin til starvsfólkalønir.

Ætlanin er eisini at broyta lógina soleiðis, at landsstýrismaðurin í skúlamálum gevur frískúlunum tímar til serligan tørv.

Nú ger Sernám tað. Hendan broyting er eisini gjørd fyri fólkaskúlarnar. Undirvísingarstýrið umsitur tímarnar til serligan tørv.