Royna at stytta viðgerðina av matrikulmálum

Arbeitt verður við at gera mannagongdir, so málsviðgerðartíðin í sambandi við matrikulering og útskifting verður stytt.

Men enn er ikki komið á mál.

Helgi Abramhamsen, landsstýrismaður, hevur svarað Johan Dahl, løgtingsmanni, sum spurdi um matrikulering og útskifting.

Johan Dahl heldur, at viðgerðartíðin er ov long.

Fjøltáttað viðgerð

Helgi Abrahamsen svarar, at matrikuler málsviðgerð er sera ymisk og fjøltáttað. 

Øll matrikuler mál skulu til hoyringar hjá avvarðandi kommunu. 

Harafturat kunnu vera onnur, sum skulu spyrjast um málið, so sum Búnaðarstovan, Landsverk, og friðingarmyndugleikarnir.

Slík hoyring tekur í minsta lagi tveir mánaðir.

Í sambandi við útstykkingar kemur eisini ofta fyri, at grundstykkini verða seld eins skjótt, sum tey eru projekterað, men matrikulmyndugleikin kann ikki gera uppmátingar og seta stykkini av, fyrr enn útstykkingin er liðug við vegum og øllum innleggingum. 

Hetta vita fólk ikki, og tí fær matrikulmyndugleikin ofta skyldina, um viðgerðin tekur langa tíð.

Seld ov tíðliga

Í veruleikanum eru grundstykkini seld ov tíðliga, sigur Helgi Abrahamsen.

Tað vil siga, at sera stórur munur kann vera á brutto-málsviðgerðartíðini og netto-málsviðgerðartíðini, tað er tíðini frá tí søkt er um matrulering, og tíðini, har arbeiðast kann við umsóknini.

Helgi Abrahamsen sigur eisini, at seinastu tíggju árini hevur bara ein føroyingur lært at vera landmátari.