Nógv ferðafólkaskip til Noregs

Í ár fara 2.665 skip við ferðafólkum at vitja í Noreg, og tilsamans vera 4,7 milliónir fólk við skipunum, skrivar Nettavisen.

Talan er um nógv fleiri skip enn í fjør, og tað hendir, hóast norska ferðavinnan mælir til at minka um talið av ferðafólkaskipum.

Talan er um ein vøkstur í skipum uppá 18 prosent og í ferðafólki er vøksturin 26 prosent, í mun til í fjør.

Eftir ferðaætlanini hjá skipunum, fara 700.000 fólk at vitja í Bergen, 120.000 fleiri enn í fjør, í Stavanger verður vøksturin úr 464.000 til 500.000 í ár og í Ålesund verður vøksturin úr 337.000 upp í 420.000 fólk í ár.

Á fleiri øðrum plássum verður eisini talan um stóran vøkstur, skrivar NRK.

Metingin fyri árið vísir, at 63 prosent av nógvu skipunum fara at vitja norskar havnir frá juni og til august.

Mælt verður til ein ferðafólkaskatt, og at nógv størri umhvørviskrøv verða sett til skipini sum vitja, tí tey økjast í tali fyri hvørt ár.