Innsiglingin kannast

Jørgen Niclasen, landsstýrismaður, hevur svarað Brandi Sandoy, løgtingsmanni, sum spurdi, nær grótið í innsiglingini í Skopun verður tikið burtur og, um grótkastið verður umvælt.

Havnin í Skopun er kommunal, og tí eigur Landsverk ikki grótkastið, svarar Jørgen Niclasen. Landsverk upplýsir, at grótið, sum kemur í innsiglingina í Skopun, er restin av brimverjuni, sum bleiv løgd uttan fyri pirin á Bergi fyrst í nítiárunum. 

Av tí, at tann verkætlanin ongantíð varð gjørd liðug, er grótið farið við briminum, og nakað er endað í innsiglingini.

Bæði í 2015, í 2017 og í 2019 er grót ruddað burtur í innsiglingnini í Skopun, so trygt er hjá Teistanum at sigla har. Um grót er har aftur nú, fæst at vita fyrst í mai, tá Landsverk hevur kannað innsiglingina.