J&K Petersen sleppur at bjóða upp á floghavn

J&K Petersen Contractors er eitt av feløgunum, sum sleppur at bjóða upp á arbeiðið at gera flogvøll í Qaqortoq í Grønlandi.

Tað skrivar grønlendska kringvarpið.

Tilsamans fimm feløg eru undangóðkend at bjóða: eitt kanadiskt, danska/íslendska Ístak, donsku feløgini MT Højgaard og Munck-Gruppen, og so J&K Petersen Contractors.

Munck Gruppen hevur frammanundan fingið arbeiðini at útbyggja floghavnina í Nuuk og í Ilulissat.

Felagið, sum stendur fyri at byggja floghavnina í Qaqortoq, skal gera avtalu við felagið, sum fær arbeiðið, í mai í ár. Og ætlanin er, at arbeiðið skal byrja í summar.

Ætlanin er, at floghavnin í Qaqortoq skal vera liðug í seinasta fjórðingsári í 2023, skrivar grønlendska kringvarpið.