Samráðast nú við Kommunala arbeiðsgevarafelagið

Sáttmálasamráðingarnar millum Kommunala arbeiðsgevarafelagið og Starvsmannafelagið eru byrjaðar.

Fyrrapartin í gjár góvu feløgini hvørt øðrum sáttmálakrøvini.

Samráðingarleiðari hjá Starvsmannafelagnum er Súni Selfoss, og samráðingarleiðari hjá kommununum er Anita Fuglø.

Næsti fundurin verður týsdagin í næstu viku, 18.februar. 

Sáttmálaøkið umfatar starvsfólk, sum arbeiða hjá kommunum og kommunalum felagsskapum.

Fund við sjúkrarøktarfrøðingarnar í morgin

Lønardeildin hjá Fíggjarmálaráðnum hevur fund við felagið hjá sjúkrarøktarfrøðingum í morgin, og í næstu viku skal Lønardeildin hitta Lærarafelagið og Akademikarafelagið.

Samráðingnar eru ikki byrjaðar enn við onnur fakfeløg á almenna arbeiðsmarknaðinum. 

Sáttmálarnir hjá 15 fakfeløgum fóru úr gildi 1.oktober í fjør.

Sáttmáli er gjørdur við eitt felag, Starvsmannafelagið.

Hjá 12 fakfeløgum á almenna arbeiðsmarknaðinum fara sáttmálarnir ikki úr gildi fyrr enn 1.oktober í ár, tí teir eru galdandi í trý ár.