Tóm bingja feyk á sjógv

Fyrrapartin feyk ein tóm bingja á sjógv í Havn.

Bingjan, sum er 40 føtur, stóð á eystara mola og rak yvir um vágna. 

Fyrst bar hon við land á Tinganesi, áðrenn hon legði seg í eitt tómt bátapláss í Vágsbotni uttast við Tinganes.

Bingjan skaddi ikki nakran bát á ferð sínari á eystaru vág.

Samson og Skúmarin hjá Mest fóru eftir bingjuni.

Nógvur vindur, 22-25 metrar um sekundið í hvirlunum, var á molanum. Ættin er landssynningur, sum er ring ætt í havnini í Havn.