Rokning fyri eldsløkking framvegis ógoldin

Skipasmiðjan Mest hevur framvegis ongar pengar fingið fyri arbeiðið, sum báturin hjá MEST, Samson, gjørdi, tá eldur var í Varðanum Pelagic í juni 2017. 
 
Ósemja var um, hvør skuldi rinda rokningina, sum er 205.000 kr.

Tvøroyar kommuna vildi ikki gjalda, tí býráðið heldur uppá, at eldurin var so mikið stórur, at hann kemur undir ta tilbúgving, sum landið eigur at gjalda.

Men landið vildi heldur ikki gjalda rokningina, tí eingin heimild var fyri tí.

Aftur á Tvøroyri

Tí endaði hon aftur á Tvøroyri.

Pengarnir eru ikki avgerandi í hesum føri, segði býráðið á Tvøroyri.

Sambært býráðnum, sum viðgjørdi málið 14.juni 2018, er talan um eitt "prinsippmál", ikki um eitt pengamál.

Óvist er eisini, hvør bað Samson koma at sløkkja, ella, um hann fór av sínum eintingum.