Afturkalla sóttreinsandi evni

Ein donsk fyritøka hevur fingið boð um at kalla eina vøru aftur, sum fyritøkan hevur marknaðarført sum hondspritt.

05.04.2020 - 16:31

Av tí at eftirspurningurin eftir spritti er stórur, eru tað handlar og fyritøkur, sum ikki fáa bílagt vanligt hondspritt í hesum døgum og tí verða onnur evni brúkt.

Fyritøkan NowoCoat hevur síðan koronasmittan byrjaði marknaðarført fimm-liturs dunkar av sóttreinsandi evni, at hava somu ávirkan sum hondspritt.

Men nú verður ávarað ímóti evninum - tað kann ikki nýtast til at sóttreinsa húð, sigur Niels Højby, sum hevur verið leiðanid yvirlækni á Ríkissjúkrahúsinum sambært fleiri donskum miðlum.

Vøran er millum annað seld til kommunur og matvøruhandlar í Danmark. Har hava dunkarnir verið settir upp í durinum til kundarnar at nýta sum hondspritt.

Umhvørvismálaráðið í Danmark hevur givið boð um, at NowoCoat alt fyri eitt skal gevast við at marknaðarføra sóttreinsandi evni sum hondspritt, og kalla vøruna aftur úr øllum handlum.

Hjá Heilsufrøðiligu Starvsstovuni í Føroyum hava tey ikki eftirlit við tílíkum vørum sum hondspritt og sóttreinsandi evnum, og tey hava heldur ikki heimild til at kalla vørur aftur.

Malan Nicolinudóttir Mikkelsen, leiðari á matvørudeildini hjá Heilsufrøðiligu Starvsstovuni, sigur, at tey fara kortini at seta seg í samband við viðskiftafólk teirra, fyri at kunna tey um støðuna.