Eingin tilburður innanlands síðani 6. apríl

Í gjár vóru tveir mánaðir síðani, at fyrsti koronutilburðurin varð staðfestur í Føroyum.

Tann 3.mars varð staðfest, at ein maður hevði koronu. Hann hevði verið á ráðstevnu í París. Síðani er smittan funnin hjá 186 fólkum í Føroyum.

Í gjár vóru 185 staðfest at vera frísk aftur. Flestu smittutilburðirnir vórðu fráboðaðir 16.mars. Teir vóru 19. 6.apríl varð ein tilburður fráboðaður.

Síðani er eingin tilburður funnin innanlands í Føroyum. 

Komin við flogfari

Men teir tríggir tilburðirnar, sum eru staðfestir síðani 6.apríl, eru fólk, sum eru komin til Føroya við flogfari. Ein tilburður varð staðfestur 18. apríl og tveir 22. apríl.

Í gjár vóru 8.066 fólk kannað. Hetta er 15 prosent av fólkatalinum í Føroyum. 

Tey flestu smittaðu, 43, eru í aldursbólkinum 20 til 29 ár.

Smittan er funnin hjá 11 børnum í aldursbólkinum null til níggju ár, og í aldursbólkinum 10 til 19 ár eru skrásett 21 smittað.