Kanna tørvin á heilsustarvsfólki næstu 10 árini

Hóast samgongan ásannar, at brúk er fyri fleiri heilsustarvsfólkum í Føroyum, tekur meirilurin í Trivnaðarnevndini ikki undir við uppskotinum til samtyktar hjá Tjóðveldi um at fáa útbúgvið fleiri røktarstarvsfólk.

Uppskotið er gamalt. Fyrsta viðgerð var 12. november.
 
Meirilutin í Trivnaðarnevndini, samgongufólkini, sigur, at landsstýrið arbeiðir longu við málinum at fáa fleiri heilsustarvsfólk. 

Kannar tørvin

Landsstýrismaðurin í mentamálum hevur greitt Trivnaðarnevndini frá, at nú verður kannað, hvør tørvurin er á heilsustarvsfólkum komandi 10 árini. 

Millum annað nevndi landsstýrismaðurin møguleikan fyri, at Suðuroyar sjúkrahús kann gerast til útbúgvingarsjúkrahús.  

Meirilutin tekur uppskotið hjá Tjóðveldi í størsta álvara, men metir ikki, at tað er neyðugt at taka undir við uppskotinum, tí landsstýrismaðurin longu hevur sett arbeiðið í gongd.