Øll børn sleppa aftur á stovn

Í dag sleppa øll børn í Føroyum aftur á dagstovn, um foreldur og børn vilja tað.

Fyri tveimum mánaðum síðani vórðu almennu koronatiltøkini sett í verk í Føroyum, og dagstovnarnir í landinum vórðu mest sum stongdir fyri øllum børnum.

Men í dag kunnu øll foreldur koyra børnini á dagstovn, uttan at neyðugt er at skriva børnini upp til barnaansing frammanundan.

Seinastu tvær vikurnar hevur verið neyðugt hjá foreldrum at skriva børnini upp til barnaansing, eftir at dagstovnarnir so smátt lótu uppaftur.

Og ymiskt var, hvussu nógv børn sluppu á stovn. Nógvastaðni hevur bara verið pláss fyri umleið helvtini av børnunum.

Eingin dagførd vegleiðing

Kommunufelagið hevur onga dagførda vegleiðing fingið frá Coronuráðgevingini enn, men vegleiðingin til skúlarnar er komin, segði formaðurin í felagnum við útvarpið fríggjadagin.

Eyðun Christiansen væntar, at leisturin verður tann sami á dagstovnum,  at stovurnar skulu halda seg fyri seg sjálvar, og ikki flyta børn og vaksin millum stovurnar.

Enn er ikki vist, hvussu uttanduravirksemið hjá dagstovnunum verður skipað, tí vanliga eru allar stovur í sama garði.

Almennu tilmælini um reinføri og frástøðu halda fram, men í fyrru vegleiðingini til dagstovnar frá Coronuráðgevingini stendur, at tað ber ikki til at sleppa undan kropsligum sambandi við børnini, og tað er heldur ikki neyðugt.