Stuðulin nærkast trimum milliónum

Stuðulin úr landskassanum til fyritøkur, sum eru komnar illa fyri í koronutíðini, nærkast trimum millionum krónum.

Á middegi fríggjadagin hevði Taks avgreitt 60 umsóknir um stuðul sambært hjálparpakka tvey. Stuðulin var tá tvær milliónir og 936.000 kr.

Flestu fyritøkurnar, 49 av teimum 60, siga seg hava mist millum 60 og 100 prosent av umsetninginum.

Til fastar útreiðslur

Fyritøkurnar fáa stuðul til fastar útreiðslur, so sum húsaleigu, el, hita, rentur, trygging og fjarskifti.

Tær kunnu fáa í mesta lagi 80.000 kr. um mánaðin. Størsti stuðulin higartil er 214.012 kr. fyri ársfjórðingin. 

Nú fáa 1.833 fólk lønarískoyti frá Als sambært hjálparpakka eitt.Talið er nógv minkað. Tað hevur verið uppi á 4.320. Tað var 4.apríl.