Grønland letur upp aftur

Mánadagin letur Grønland landamørkini upp aftur. 600 fólk sleppa at ferðast til Grønlands um vikuna, skrivar grønlendska kringvarpið.

Tey, som koma til Grønlands, skulu vísa váttan um negativa COVID-19 kanning. Tey skulu eisini útfylla eitt pappír og siga, hvar tey skulu. 

Men, tey sleppa ikki heilt undan sóttarhaldi. Tey skulu í heimauppihald, inntil tey eru kannað aftur í Grønlandi, í seinasta lagi fimm dagar seinni.

Síðani skulu tey vísa váttan um negativa COVID-19 kanning, áðrenn tey sleppa út.

- Vit hava øll eina ábyrgd í sambandi við upplatingina. Vit mugu fylgja heilsufakligu tilmælunum og reglunum um sóttarhald, sigur Kim Kielsen, landsstýrisformaður. 

Upplatingin í Grønland er deild upp í trý stig, og at lata upp fyri 600 ferðafólkum um vikuna við einum styttri sóttarhaldi, er fyrsta stigið. 

- Vit fylgja við smittuni í Danmark, og hvussu tað gongur teir næstu 14 dagarnar, áðrenn vit taka støðu til stig tvey í upplatingini, sigur Kim Kielsen. 

13 fólk hava havt koronasmittuna í Grønlandi, og í løtuni er eingin smittaður.