- Tíðindi, mentan og ítróttur
Outlook óvirkin um allan heim

Teldupostskipanin Outlook hjá Microsoft er óvirkin um allan heim í løtuni, eisini her í Føroyum.
Bretska kringvarpið BBC sigur, at Outlook-brúkarar í 74 londum hava trupulleikar við Outlook. BBC hevur kannað dátur úr øllum heiminum á heimasíðuni Downdetector, har tað ber til hjá brúkarum at boða frá brekum í online-tænastum.
Arbeiðsdagurin hjá fólki í londum, sum eru langt framman fyri okkum í tíð, er longu nógv órógvaður av, at Outlook ikki riggar, sum tað skal.
Mest nýtta skipanin
Fyri løtu síðan boðaði Microsoft frá góðum úrslitum í royndunum at fáa teldupostsamskiftið um Outlook-skipanina í rættlag aftur.
Outlook man vera tann mest nýtta telduposttænastan í heiminum yvirhøvur, og sum skilst er tað ikki bara Outlook, men eisini aðrar tænastur hjá Microsoft, sum eru raktar.
Tað eru tænastur, sum Microsoft bjóðar við Microsoft 365-loysnunum.
Tað er ikki greitt, nær órógvin byrjaði, men á Kringvarps-redaksjónini byrjaðu trupulleikarnir við Outlook longu í gjárkvøldið.

























