Missa 225 milliónir um dagin

Í Svøríki er tað ein búskaparlig vanlukka fyri ferðavinnuna, at flestu londini í Evropa mæla fólki frá at ferðast til Svøríki. Tað heldur ferðavinnufelagið Visita.

Svenska kringvarpið skrivar, at avleiðingin er, at ferðavinnan í Svøríki missir umleið 225 milliónir krónur um dagin.

Grannalondini helvtina av gistingunum

Í Svøríki eru flestu ferðafólkini vanliga úr Norra, Danmark, Týsklandi, Finnlandi, og Hollandi, men øll hesi londini mæla sínum borgarum frá at fara til Svøríkis, tí smittutrýstið er so høgt.

Harafturat kunnu fólk úr USA ikki ferðast til Evropa. Sambært svenska kringvarpinum er tað ein serliga harður smeitur, at grannalondini Norra og Danmark ikki vilja lata upp fyri Svøríki.

Seinastu árini hava grannalondini staðið fyri umleið helvtini av útlendsku gistingunum, sambært Thomas Jakobsson, sum er fíggjarleiðari í Visita.

Summarið mest sum farið

Mælt verður fólki frá at ferðast til Svøríki, tí har eru so nógv, sum hava koronasmittuna. Opið er kortini fyri landspartinum Vasterbotten har norðuri í landinum.

– Summarið er mest sum farið fyri okkara viðkomandi, men vit vóna sjálvsagt, at Evropa letur upp fyri Svøríki í næstum, sigur Thomas Jakobsson við svenska kringvarpið.

Svøríki hevur havt eina aðra koronastrategi enn flestu londini í Evropa. 65.000 fólk eru staðfest smittað, og 5.280 fólk eru deyð av koronasmittuni í Svøríki.