- Tíðindi, mentan og ítróttur
Landsverk: Ringt sýni ikki orsøk til ferðsluóhapp
Tað sigur Landsverk sambært Jørgeni Niclasen, landsstýrismanni, sum hevur svarað einum spurningi frá Una Rasmussen, løgtingsmanni, um innkoyringarnar til Norðragøtu.
Okkurt um 6.000 bilar koyra dagliga millum rundkoyringina í Gøtudali og Gøtugjógv. Frá 2014 til 2017 eru skrásett 11 óhapp har, eitt var við fólkaskaða. Trý óhapp vóru á vegamótunum.
Í ár hava verið nøkur óhapp við Mortansstovubrekku og við Ánna. Sambært kanningum hjá Landsverki bendir einki á, at útsýnið á vegamótunum var orsøkin til óhappini, svarar Jørgen Niclasen.
Lúka donsk krøv
Vegamótini lúka donsk krøv um útsýni. Samanborið við landsveganetið sum heild eru óhappini fyri hvønn kilometur í Gøtu beint yvir miðal.
Í 2018 var tí gjørdur ein ferðslulummi á vegamótinum við Mortansstovubrekku. Landsverk upplýsir, at bilverjan millum Mortansstovubrekku og Gøtugjógv verður skift út ella tikin niður.
Orsøkin er, at skráin á bilverjuni hevur lutfalsliga lítið hall, og tí er bilverjan óneyðug á pørtum av hesum teini, stendur í svarinum hjá Jørgeni Niclasen.