Boðsend til seglbát, sum rak norðan fyri Føroyar

Ein norskur bátur, sum roynir í landnyrðing úr Fugloynni, boðaði mikudagin føroysku myndugleikunum frá, at seglbáturin hevði rikist á somu leiðini norðan fyri Fugloynna í tveir dagar.

Myndugleikarnir hildu okkurt var áfatt, tá samband ikki fekst við einsamalla mannin umborð á seglbátinum, og bjargingartyrla og Tjaldrið vórðu tí send til seglbátin.

Tað vísti seg tó, at einki var áfatt hjá manninum, sum er einsamallur umborð á seglbátinum, sum er seks metrar langur og ein metur breiður.

Maðurin, sum er í 80-unum, er farin við seglbátinum úr Ålesund í Noregi, og hann ætlar sær at sigla við seglbátinum til Íslands.