Fáment á Vaglinum er í øllum førum tilmælið

Klokkan tvey í dag setur Doris Rasmussen á Argjum ólavsøkuna 2020, ólavsøkuna, sum ikki líkist øðrum.

Vanliga plaga millum 800 og 1000 ítróttafólk at vera í skrúðgonguni. Men í ár verða tey 64. 

16 feløg høvdu í gjár boðað frá, at tey vera við, og hvørt felag má hava fýra fólk við.

Harafturat verða 15 ross frá Føroya ríðingarfelag, býráðslimirnir og Havnar hornorkestur í skrúðgonguni.

Eingir áhoyrarar

Annars er tilmælið, at eingin fer á Vaglið klokkan tvey.

Kringvarpið, bæði útvarp og sjónvarp, sendir frá setanini.

Kappróðurin byrjar longu klokkan hálvgum tvey, tí so nógv ætla at rógva kapp í ár. 

105 manningar hava boðað frá, at tær ætla sær at rógva. Tað er met. Í fjør vóru 74 manningar.