Gilli Rólantsson fingið staðfest koronu

Føroyski landsliðsleikarin í fótbólti, Gilli Rólantsson, sum spælir fyri norska felagið Brann í Bergen, hevur fingið staðfest koronu.

Tað skrivar norski miðilin, VG.

Fyri góðari viku síðani boðaði Gilli  felagnum frá, at hann hevði verið saman við fólki, sum hevði fingið koronu, og síðani hevur hann ikki vant við liðnum, men hevur verið í sóttarhaldi.

Mikudagin boðaði felagið frá, at Gilli hevði sjúkueyðkenni, og í morgun sigur felagið, at Gilli Rólantsson er sjúkur av koronu.

Boðaði frá í góðari tíð

- Støðan er óheppin, men Gilli hevur gjørt alt, sum hann skuldi. Hann boðaði felagnum frá so skjótt sum hann kundi, og síðani hevur hann verið í sóttarhaldi við hús, sigur læknin hjá Brann, Magnus Myntevik, í tíðindaskrivi.

- Tað hevur týdning, at hann ikki hevur verið saman við øðrum leikarum, og hevur heldur ikki vant, síðani ivin um smittuna tók seg upp, sigur læknin.

Gilli Rólantsson skal vera í sóttarhaldi, so leingi tað er neyðugt, og hann sleppur ikki at venja saman við hinum, fyrr enn hann hevur verið frískur í tríggjar dagar, sigur Magnus Myntevik, lækni.

Felagið boðar samstundis frá, at Gilli Rólantsson vil ikki at tosa við fjølmiðlar.