Farmaskip við fólki og neytum horvið

Stór leiting er sett í verk út fyri japonsku strondini eftir einum farmaskipi við 42 fólkum og fleiri túsund neytum umborð. 

Skipið sendi út neyðarkall í gjár.

Ein av manningini varð bjargaður seint í gjárkvøldið. Sambært honum, er skipið sokkið.

Maðurin hevur greitt frá, at motorarnir steðgaðu og at aldurnar skolaðu inn yvir skipið, sum legði seg á liðina og síðani sakk. 

Sendi neyðarkall

Skipið "Gulf Livestock 1" flutti 5.867 neyt og varð statt vestan fyri oynna Amami Oshima í útsynning úr Japan, tá tað gjáramorgunin sendi út neyðarkall.

Tað er ikki greitt, hví tað var í neyð, men vánaligt veður var á leiðini, í kjalarvørrinum av tropisku ódnini Maysak. Og illveðrið hevur tarnað leitingararbeiðnum.

Skipið, sum siglir undir Panama-flaggi, fór úr Ný Sælandi 14. august, og skuldi eftir ætlan koma til Kina næsta fríggjadag, skrivar japanska Kyodo News.