Fingu meira ull í ár

Búnaðarstovan hevur fingið nøkur tons av ull meira í ár enn í fjør. Tey eru ikki liðug at skilja ullina enn, men í ár eru komin 28 ella 29 tons.

Í fjør komu 24 tons.

Ullin verður skild í tveir góðskuflokkar.

Fyri ull í fyrsta flokki verða latnar 10 kr. fyri kg., tá meirvirðisgjaldið er við. Fyri annan flokk verða latnar 1,50 kr. við mvg.

Nakað er so vánaligt, at tað verður vrakað.

Reinari í ár

Ullin í ár er reinari enn hon var í fjør, tí í summar var so turt. 

Hetta er fjórða árið, at Búnaðarstovan keypir ull. 

Tá liðugt er at skilja ullina í flokkar og litir, tað verður í næstu viku, verður hon pakkað og boðin út til sølu.