Fiskaútflutningurin minkaður eina hálva milliard

Fiskaútflutningurin minkaði næstan eina hálva milliard fyrstu sjey mánaðirnar í ár samanborið við somu tíð í fjør.

Afturgongdin er umleið 10 prosent, vísa tøl hjá Hagstovuni.

Størsta afturgongdin er í útflutninginum av toski og laksi.

Í ár hevur virðið av toskaútflutninginum verið 180 milliónir kr. minni fyrstu sjey mánaðirnar í fjør, ella ein fjórðing, og laksaútflutningurin er minkaður 143 milliónir kr., ella sjey prosent. 

Nøgdin eisini minkað

Nøgdirnar eru eisini minkaðar.

Tilsamans er fiskaútflutningurin fyrstu sjey mánaðirnar í ár minkaður 14 prosent.

Nøgdin av toski er minkað 29 prosent, og nøgdin av laksi er átta prosent minni enn sama tíðarskeið í fjør, visa tølini hjá Hagstovuni.