Kanna nýggjar upplýsingar um Estoniu

Estland, Finnland og Svøríki fara nú at meta um nýggjar upplýsingar, sum eru komnar undan kavi um ferjuna Estoniu, sum sakk á veg úr Tallinn til Stokkhólm í 1994.

Høvuðsorsøkin til, at skipið sakk, var sambært altjóða skaðanevndini, JAIC, at eitt bógportur loysnaði. 

Í frágreiðingini stendur einki um, at hol var á skrokkinum í stýriborð. Men í skjølum frá Monster og Dplay verður staðfest, at hol er á vrakinum.

Nú skriva Estland, Finnland og Svøríki í felags fráboðan, at tey saman fara at kanna nýggju upplýsingarnar, og fáa tær váttaðar.

- Vit, Estland, Finnland og Svøríki, leggja dent á, at vit trúgva endaligu niðurstøðuni hjá altjóða skaðanevndini, Joint Accident Investigation Commission frá 1997, stendur í frágreiðingini.

Estonia sakk náttina millum 27. og 28. september í 1994, og 852 fólk druknaðu.

Bert 137 fólk sluppu frá hendingini við lívinum, og vanlukkan er mett sum ringasta skipsvanlukka í nýggjari tíð.