Semingsroyndin heldur fram í dag

Í morgun klokkan níggju heldur semingsroyndin fram í sáttmálatrætuni millum sjúkrarøktarfrøðingar og Lønardeildina hjá Fíggjarmálaráðnum.

Partarnir og Semingsstovnurin hittust hósdagin.

Tá varð avgjørt, at sáttmálapartarnir kannaðu nýtt tilfar, teir fingu frá hinum partinum.

Í morgun klokkan níggju hittast teir aftur saman við Semingstovninum.  

Fór úr gildi fyri einum ári síðani

Nú eru góðar tvær vikur síðani, Semingsstovnurin varð boðsendur, tí Fíggjarmálaráðið og felagið hjá sjúkrarøktarfrøðingunum ikki funnu semju um nýggjan sáttmála.

Og mánadagin byrjaði semingsroyndin, sum so heldur fram í morgun.

Sáttmálin millum Felag føroyskra sjúkrarøktarfrøðinga og Lønardeildina fór úr gildi fyri einum góðum ári síðani, tann 1.oktober í fjør.

Eisini í 2017, tá tann sáttmálin varð gjørdur, var neyðugt at hava Semingsstovnin við.