Lóg um el-innleggjarar er kappingaravlagandi

Føroya handverksmeistarafelag er als ikki nøgt við lógaruppskotið hjá landsstýrinum um at løggilda el-innleggjarar.

Felagið sigur bart út í hoyringarsvari, at uppskotið grevur burtur undan trygdini, og tað er harafturat kappingaravlagandi.

Endamálið við lógini er annars at hava tryggar el-innleggingar.

Tí er tað undranarvert, sigur Handsverksmeistarafelagið, at førleikin at gera el-arbeiði ikki verður settur í hásætið. 

Vilja hava uppskotið broytt

Lógin er eisini kappingaravlagandi, tí fríyrkis el-innleggjarum ikki nýtist at rinda tær útreiðslur, sum standast av at reka eina fyritøku.

Handverksmeistarafelagið sigur, at alneyðugt er at broyta lógaruppskotið, so el-innleggjarar skulu hava fastan bústað í Føroyum, frítíðarløggildingar skulu strikast, og bara útbúnir elektrikarar skulu kunnu fáa løggilding.

Lógaruppskotið var eisini til hoyringar í januar.

Tá segði Handverksmeistarafelagið, at uppskotið tekur lægsta prís fram um trygdina, tá elarbeiði verða boðin út.

Og uppskotið er ov lagaligt viðvíkjandi útlendskum el-innleggjarum í Føroyum.