Fleiri enn fimm milliónir smittað í Brasil

Talið á fólki í Brasil, ið hava fingið staðfest COVID-19, er nú farið upp um fimm milliónir fólk, vísa almennu tølini.

Samstundis nærkast talið á teimum, sum eru deyð av koronu, 150.000, skrivar bretska kringvarpið, BBC News.

Heilsumyndugleikarnir í Brasil skrásettu 31.553 nýggjar tilburðir í gjár. Sostatt kom samlaða smittutalið upp á 5.000.694.

Brasil er meint rakt av COVID-19. Bara USA og India eru meinari rakt enn Brasil.

Forsetin, Bolsonaro, hevur verið fyri hvøssum atfinningum fyri handfaringina, síðani smittan tók dik á seg í landinum.

Ringast stendur til í Sao Paulo, har 36.000 fólk eru deyð av COVID-19.