Eykaaðalfundur í Føroya Tele

Týsdagin verður eykaaðalfundur í Føroya Tele.

Landsstýrismaðurin í fíggjarmálum skal velja nýggjan nevndarlim fyri Ómar Svavarsson.

Jørgen Niclasen, landsstýrismaður, sigur, at hann hevur funnið nevndarlimin, og viðkomandi hevur játtað at fara í nevndina.

Ómar Svavarsson, sum var nevndarformaður í Føroya Tele, segði seg úr nevndini 4.september.

Er í starvinum enn

Stjórin í Føroya Tele, Jan Ziskasen, segði eisini upp tá. Men hann er í starvinum enn, tí hann hevur seks mánaða uppsagnartíð.

Johnni M. Poulsen, næstformaður, er nú virkandi formaður í nevndini hjá Føroya Tele. 

Nevndin setur og loysir stjóran úr starvi.

Sum er bíðar nevndin eftir landsstýrismanninum, sum skal velja nýggjan nevndarlim, og stjórin bíðar eftir nevndini, sum ikki er fullmannað í løtuni, men tað verður hon týsdagin.

Tað verður ein maður, sum verður valdur í nevndina, tí í løtuni hevur landsstýrið tvær kvinnur og ein mann í nevndini hjá Føroya Tele.