- Tíðindi, mentan og ítróttur
Drúgv viðgerð um at stytta arbeiðsvikuna
![](https://kvf.fo/sites/default/files/styles/grein-ovasta-mynd/public/_christian_andreassen_portrettmynd.jpg?itok=4QplMapk)
Uppskotið um at stytta arbeiðsvikuna hevur havt eina langa viðgerð í Rættarnevndini hjá løgtinginum.
Nevndin fekk málið 3.september, og álitið er ikki komið enn.
Javnaðarflokkurin hevur uppskot til samtyktar um at stytta arbeiðsvikuna.
Fyrsta viðgerð var í tinginum 3.september.
Rættarnevndin ger nógv burturúr uppskotinum. So nógv, at nevndin 6.oktober bað um og fekk longda freist til at avgreiða málið. Freistin varð longd til 20.oktober.
Einki álit komið enn
Rættarnevndin hevur viðgjørt málið á fýra fundum og hevur tosað við umboð fyri 15 feløg og myndugleikar. Nevndin gjørdi av á fundi 28.september at skriva álit.
Tað álitið er ikki komið í løgtingið enn.
Sambært tingskipanini skal ein nevnd lata løgtinginum álit í seinasta lagi ein mánað eftir, at hon fekk málið.
Rættarnevndin fekk uppskotið um at stytta arbeiðsvikuna 3.september, fyri skjótt trimum mánaðum síðani.
Tað er ikki óvanligt, at nevndir hava mál longri enn ein mánað. Í hesi tingsetuni eru 12 onnur slík tingmál.