Eingin doyði, men framvegis nógv ferðsluóhapp

Eingin doyði í ferðsluni í Føroyum í fjør.

Og hetta er aðru ferð í hesari øldini, at vit kunnu siga, at eingin doyði í ferðsluni í árinum, sum fór, sigur Ráðið fyri ferðslutrygd.

Men ferðsluóhappini við fólkaskaða eru ikki færri nú enn fyri 10 árum síðani.

Ráðið fyri ferðslutrygd sigur, at neyðugt er at kanna allar álvarsligar ferðsluvanlukkur í Føroyum og at seta í verk skipaða skaðakanning og seta skaðanevnd. 

Hetta er eisini fremsta tilmælið í ferðslutrygdarætlanini fyri Føroyar 2019 til 2027.

Ov nógv ferð

Ov nógv ferð er ofta orsøkin til óhapp í ferðsluni.

Lóður hevur gjørt eina kanning fyri Ráðið fyri ferðslutrygd.

Átta prosent av teimum, sum siga seg vanliga koyra 80 km/t ella minni enn tað á landsvegi, har mest loyvda ferðin er 80 km/t., siga seg hava verið fyri ferðsluóhappi.

12 prosent av teimum, sum siga seg koyra 90 km/t, og heili 20 prosent av teimum, sum siga seg koyra 100 km/t ella skjótari, siga seg hava verið fyri ferðsluóhappi.