Tóku 73.000 tons av laksi í fjør

Føroysku alifyritøkurnar tóku í fjør knappliga 73.000 tons av alilaksi í Føroyum. Heilt neyvt var talið 72.918 tons. Uppgerðin er í kruvdari vekt.

Hetta er nakað minni enn í 2019, tá ið framleiðslan var umleið 78.000 tons. Tað er tað mesta, sum nakrantíð er tikið í einum ári seinastu 10 árini. 

Frá 2011 og til 2020 hevur tøkan ligið millum 50.000 og 78.000 tons um árið.

Miðalvektin í fjør var 5,20 kg. Tað er eitt sindur minni enn miðalvektin í 2019, sum var 5,45 kg, men tó betri enn í 2018, tá miðalvektin var 4,87 kg.