Danmark rindar koppingarevni fyri alt ríkið

Danska stjórnin rindar fyri alla koronukoppseting, sum danska ríkið fær. Eisini koppingarevnið, sum verður sent til Føroya og Grønlands.

Tað upplýsir danska Heilsumálaráðið fyri Kringvarpinum. Vanliga rinda Føroyar og Grønland sjálvi fyri sín heilivág og koppingarevni, men júst koronukoppingarevnið er eitt undantak.

Tá ið Kringvarpið spurdi danska Heilsumálaráðið í november í fjør, var svarið annars, at Føroyar sjálvar skulu gjalda fyri korona-koppingarevnið, eins og gjørt verður við øll onnur koppingarevni, ið Føroyar fáa í samstarvi við danskar heilsumyndugleikar og Serumstovnin.

Støðan broytt

Men tann støðan er nú broytt. Føroyar og Grønland fáa sín lutfalsliga part av koppingarevnunum fyri korona, í mun til fólkatalið í londunum.

Danska stjórnin rindar fyri alt koppingarevnið fyri korona, sum Danmark fær fatur á. Landsstýrini í Føroyum og Grønlandi skulu tó sjálvi gjalda flutningsútreiðslurnar og kostnaðin av at koppseta fólk, upplýsir danska Heilsumálaráðið. 

Koppingarevnið til allar føroyingar verður mett at kosta umleið sjey milliónir krónur.