Eingin smitta funnin í gjár

Eingin koronusmittutilburður varð staðfestur í gjár.  Í gjár vórðu 380 kanningar gjørdar í Føroyum. Nú eru sjey fólk smittað í Føroyum. 

Talið er komið har niður, tí nú eru smittaðu fólkini í ferðalagnum hjá kekkiska landsliðnum hjá monnum í handbólti, sum kom til Føroya 4. januar, ikki við í talinum longur. Í ferðalagnum vóru átta smittað.

Koppseting á heimasíðu

Eitt fólk er innlagt, og 66 eru í sóttarhaldi. Heimasíðan corona.fo fer nú dagliga at kunngera, hvussu nógv fólk er koppsett fyri koronu í Føroyum.

Higartil hava 2.664 fólk fingið fyrra prikið. Hetta eru fimm prosent av fólkatalinum í Føroyum. Enn hevur eingin í Føroyum fingið seinna prikið.  

Sambært kunngerðini um koppsetingina verða tey, sum eru í serligum vanda fyri at berast álvarsliga sjúk, verða tey smittað,  kopsett í næstu viku.