Trump fríkendur í ríkisrættarmálinum

Ríkisrættarmálið móti fyrrverandi amerikanska forsetanum, Donald Trump, endaði brádliga í gjárkvøldið, og úrslitið gjørdist, at Trump varð fríkendur. Hann var ákærdur fyri at eggja til uppreistur 6. januar, tá stuðlar hjá honum troðkaðu seg inn í kongressina. 57 av teimum 100 senatorunum atkvøddu fyri at døma Trump, meðan 43 atkvøddu ímóti. Hóast ein meiriluti atkvøddi fyri at døma fyrrverandi forsetan, skulu minst tveir triðingar, 67 senatorar atkvøða fyri, um forsetin skal dømast og tí varð hann ikki dømdur. Ætlanin var annars ikki, at málið skuldi til endaliga atkvøðugreiðslu í gjár. Senatið hevði avgjørt av, at innkalla vitni at geva munnligar frágreiðinginar aftrat teimum skrivligu frágreiðingunum. Tað hevði kunnað drigið málið út í fleiri vikur aftrat, men tann avgerðin varð brádliga slept í gjárkvøldið. Tí fór málið beinleiðis til atkvøðugreiðslu. Hevði Trump verið dømdur hevði hann ikki kunnað stillað uppaftur til forsetavalið í 2024, men av tí at hann ikki var dømdur í hesum seinna ríkisrættarmálinum heldur, er tað ikki ein forðing fyri at hann kann stilla upp. Eftir avgerðina sendi Trump út eitt tíðindaskriv og kallaði ríkisrættarmálið fyri størstu jagstranina í søguni. Hann segði eisini, at tað enn bert er byrjanin til hansara Make America Great Again rørðslu.